‘No vaxx, no entry’ sa COVID-19 Alert Level 1 magdepende sa LGU

Davao City – Giklaro sa Davao City Coronavirus Disease 2019 (COVID-19) Task Force (TF) nga magdepende gihapon sa Local Government Unit (LGU) kung kini magpatuman sa “No vaccination, no entry” sa mga establisyemento ilawom sa COVID-19 Alert Level 1, diin gipailawom karon ang syudad sa Davao.

Gikanayon ni Dr. Michelle Schlosser, tigpamaba sa Davao City COVID-19 TF (sa interbyu sa city-owned radio), base sa amended guidelines sa Inter-Agency Task Force (IATF) ilawom sa Alert Level 1, mandatory ang pagpresenta sa maong rekisitos sa public o private establishments alang sa 18 anyos pataas.

Apan gitataw ni Schlosser, aduna gihapoy katungod ang lokal nga gobyerno kung ilang ipatuman ang maong direktiba diin wala pay opisyal nga Executive Order (EO) nga gipagawas ang City Government of Davao kabahin niini.

“If in case nga i-adopt gyud fully sa atong LGU na required ang mandatory na vaccination card or vaccination certificate in an establishment, pwede gyud nato na siya buhaton pero pwede pud ‘ta mudili ana,” sulti ni Schlosser.

Personal nga opinyon sa health official nga mas maayo nga mahimong requirement sa mga establisyemento ang vaccination card/certificate pagsigurong protektado batok sa virus ang mga tawo labi nga wala nay restrictions ug fully operational na ang mga establisyemento ilawom sa COVID-19 Alert Level 1.

RadyoMaN Kirby Manzon