Sumala ni Ensign Vasit Venturillo, Coast Guard Southeastern Mindanao spokesperson, nilusad og Search and Rescue operation sa tulo ka mga mananagat ug duha ka mga indibidwal human nahanaw sa kadagatan.
“Hangtod karon padayon ang Philippine Coast Guard sa pag-conduct og search and rescue para atoang makita ang mga missing persons. Base sa amoang experience naay mga higayon nga maanod sila sa Gov Gen, sa Mati o didto na sa Indonesia, kining tanan nga mga possibilities na-coordinate na nato sa ilaha, sa mga Coast Guard stations and sub stations ani nga mga areas para dali nilang ma-endorse sa ato kung makita nila,” sumala niini.
Na-missing niadtong February 22, 2022 ang duha ka mananagat nga sila Dodo Belarmino, 40 anyos ug giilang Jebsy, 25 anyos human madautan og makina ang puti nga bangka nga adunay markang FBCA Jelay samtang nangisda sila sa kadagatan sa Brgy. Kiobog, Don Marcelino, Davao Occidental, samtang ulahing nakita niadtong Pebrero 25, 2022 ang mananagat nga si Jorly Nike, 33 anyos, residente sa Sitio Manaboy Brgy. Patuco , Sarangani, Davao Occidental, samtang nanagat kini sa Brgy. Caburan, Jose Abad Santos.
Nakaplagan na ang usa sa mga lalaking nawala sukad pa niadtong Pebrero 25, 2022 sa kadagatan sa Brgy. Dapnan, Baganga, Davao Oriental.
Gikumpirma ni LTJG. Elmar Mesina, Coast Guard Station Davao Oriental Commander, narekober ang patayng lawas ni Dave Imbang, 43 anyos sa Barangay Mayo, Mati City, Davao Oriental kun 100 kilometros gikan sa Brgy. Dapnan, Baganga diin ulahi kining nakitang buhi sa dihang iyang gisalbar ang nalumos nga kabanay nga mga bata.
Gibutyag ni Mesina, pasado alas 2:00 sa kadlawon Marso 2, 2022 nakita sa mga mananagat ang naglutaw-lutaw nga patay’ng lawas sa biktima. Pasado alas 4:00 sa kadlawon niabot kini sa baybayon ug daling gireport sa mga awtoridad.
Ang PCG nakigcoordinate sa kabanay ug positibo kining giila pinaagi sa iyang tattoo sa kumingking.
Nagpadayon gihapon ang seaborne patrol sa Coast Guard sa Mayo Bay, Mati City, Davao Oriental sa pagpangita sa usa pa ka kaubanan niining nawala.
RadyoMaN Aimee Guinita
