SEOUL — Gina-finalize na sang North Korea ang plano nga pag-atake sa Guam.
Sa pahayag nga ginpagwa sang Korean People’s Army (KPA), sa tunga-tunga sang bulan Agosto matapos na ang ila plano sa pag-atake sa Guam nga isa sa mga estado sang Amerika.
Kun matapos na ang plano, ila ini ipadala kay North Korean leader Kim Jong Un kag magahulat sa mandu sang ila commander-in-chief kun san-o ipatuman ang pag-atake.
Suno kay Gen. Kim Rak Gyom sang KPA, ang North Korean Strategic Force ang mangamot sang missile attack kun may go signal na sang ila lider.
Apat ka mga Hwasong-12 intermediate-range missiles ang pagabuy-an sa ila target nga Guam kun sa diin man nahamtang ang military bases sang Amerika.
Nahibalu-an nga halos 6, 000 ka tropa sang Estados Unidos ang yara sa Guam kag diri man makit-an ang Anderson Air Force Base kag Naval base Guam nga ginbutangan sang B52 bombers, fighter jets kag submarines sang U.S.
Suno sa Pyongyang, ang capital sang North Korea, nga ang igalunsar nga missiles ang maagi sa air space sang Shimane, Hiroshima kag Koichi prefectures sang Japan.
Magalupad ini sang 3, 356.7 kilometers sang sulod lang sa 1, 065 segundo ukon 17 minutes maga-landing na ini sa kadagatan 30 tubtob 40 kilometers halin sa Guam.
“(Korean People’s Army) is seriously examining the plan for an enveloping strike at Guam through simultaneous fire of four Hwasong-12 intermediate-range strategic ballistic rockets in order to interdict the enemy forces on major military bases on Guam and to signal a crucial warning to the US,” suno sa statement nga ginpagwa sang KPA.
Ang panibag-o nga pagpamahug sang NoKor ang kasunod man sang pahayag ni US President Donald Trump nga makit-an guid sang North Korea ang ‘fire and fury’ sang Amerika kun indi sila mag-untat sang ila probokasyon.
Ginpahayag sang NoKor nga ang pagpamahug nga ginbuhat ni Trump ang mas nagpaakig pa gid sa mga Hwasong artillerymen sang Korean People’s Army.
