Davao City – Nakaani og pagdayeg sa tibuok kalibutan ang panagpulong ni North Korea Leader Kim Jong Un ug ni South Korea President Moon Jae-In kay sinugdanan na kini sa pagtuldok sa dekada na nilang bangi.
Usa sa nalipay mao si US President Donald Trump nga sa katapusan nasumpay na pag-usab ang naputol nga relasyon sa North ug South Korea bisan og hagbay ra nahuman ang giyera sa Korean Peninsula.
Mao na unya kini ang sinugdanan sa kalinaw sa duha ka nasod nga nahikaw sa dugay’ng panahon hilabi na nga gipanaad ni Kim Jong Un nga iyang undangon ang paglambo og nuclear weapon.
Giingon ni Humanitarian Organization for Peace Engagement focal person Hope Fernandez nga dili layo ang posibilidad nga mahitabo usab kana sa GRP ug teroristang CPP-NPA-NDFP basta mupakita lang og sinseridad ang mga kumunista.
Gikahimut-an ni Fernandez si Kim Jong Un kay bisan og naila kini nga mangtas nga klaseng leader apan makita ang iyang pagkamatinud-anon sa pakighiuli sa ilang mga kaliwat sa South Korea.
Nahikutar ang pagsinabtanay sa duha ka nasud tungod kay pareho nilang gipadaplin ang ilang mga inte-rest sa ilang mga nasud inay nagtutok sila sa usa ka lugar nga puwede mag-abot ang ilang tinguha.
Kung mapanaminan lang unta sa CPP-NPA-NDFP ang gibuhat sa duha ka nasud hayan taas ang porsyento nga makab-ot ang maayong bunga sa peace talk aron humanon ang upat ka dekadang bangi.
Dugang pasabot ni Fernandez nga usa sa rason nganong wala maresolba ang problema tungod kay dili andam mobuhi ang CPP-NPA-NDFP sa ilang gibarugan nga gun-ubon ang gobyerno aron pulihan ug komunistang panggobyerno.
RadyoMaN Joel Viray
