Davao City – Nasayran sa kapulisan nga dili lamang dinhi sa Davao City nagahimo’g krimen apan sa nagkadaiyang lugar sa Davao Region ang napatay nga suspek atol sa buy-bust operation duol sa usa ka machine shop sa may JP Cabaguio Ave., Davao City ala-1:00 adlaw’ng Miyerkules sa hapon.
Giila ni Talomo PNP station commander Police Major Ronald Lao ang suspek nga si Gregorio Lim, 33 anyos.
Gibutyag ni Lao nga napalitan og duha ka gramos sa shabu ang suspek apan human makamatikod nga pulis ang iyahang ka-transak namusil kini ug una hinungdan nga nibalos na ang ilahang tropa.
Nakutluan sa kinabuhi ang suspek sulod sa Southern Philippines Medical Center (SPMC).
Modus matud pa sa suspek nga magpakaaron ingnong kustomer sa mga karenderya ug kung malipat na ang mga biktima kawaton na niini ang mga halin sa kaha.
Nipatim-aw usab sa crime scene ang upat ka mga gibiktima sa nasangpit nga suspek sa may sa Cabaguio Ave., ning syudad nga sila Rosemarie Escollar kinsa gikawatan og nagkantidad og P14,000 sulod sa iyahang tindahan niadtong Marso 2.
Niadtong Marso 5 usab gidagit sa suspek ang cheque nga nagkantidad sa P56,000 ug P40,000 nga cash ug uban pang kagamitan sulod sa may Reyna Diesel Calibration Services nga gipanag-iyahan ni Noe Arocha.
Nireklamo usab si Rodante Enoc, 44 anyos kinsa gikawatan niadtong Pebrero ug cellphone ug wallet sulod sa karenderya.
Gisaysay sa Eugene Tumulak, 54 anyos nga gawas sa gikawatan kini sa og halin sa ilahang karenderya og P12,000 sa maong suspek lagmit siyang mapusilan-patay niini.
Ang napatay nga suspek adunay mga pending cases sa nagkadaiyang mga kaso dinhi sa Davao Region.
RadyoMaN Aimee Guinita
