GISUGDAN na sa paghatud sa Provincial Road Clearing Task Force pinaagi sa opisina sa Provincial Engineering ang tagsa-tagsa ka mga Notices of Road Obstruction and Road-right-of-way Encroachment ngadto na sa mga hingtundang indibidwal, mga lokal nga kagamhanan sa barangay, lungsod og syudad niining probinsya sa Bukidnon niadtong adlaw nga Miyerkules, Disyembre 16, 2020.
Basi sa gipagula nga imbentaryo sa kadalanan sa probinsya, na identipikar og na dokumento sa Opisina sa Engineering sa probinsya ang 1,095 ka mga illegal nga mga butang, istraktura, materyales og aktibidadis nga nakahimong nakababag og nakalapas sulod mismo sa dyes (10) metros nga sukod sa dalan sa probinsya nga gi-mentenar sa Kagamhanang Probinsyal sa Bukidnon.
Apil niini ang sa nakaparadang sakyanan sa dili angayan nga paradahan, ilegal nga terminal o alihanan sa mga sakyanan, tindahan o baligyaanan, materyales sa construction sama sa balas, bato, semento og kabilya, balay lakip na ang koral/gate, tolda og pagpahigayon sa mga aktibidad nga dunay kalambigitan sa panimalay, mga karatola o timailhan, outpost sa barangay, barangay hall og mga alihanan nga gitaud sa barangay, pagbulad sa mais, humay og uban pang produkto, mga salin sa natumpag o naguba nga istraktura, mga basura og uban pang gubaon nga mga butang, og lain pang mga butang, istraktura, materyales og aktibidad nga naila nga naka babag sa dalan.
Gilauman sa mga membro sa task force nga bulontaryong paga-tanggalon, balhinon og hawanan sa mga hingtundan ang nailang nilapas o nibabag sa dalan human madawat ang maong notisya.
Ang maong direktiba basi sa kamanduan sa Department of Interior and Local Government o DILG og alayon sa mandu ni Presidente Rodrigo Duterte panahon sa iyang State of the Nation Address (SONA) sa nilabay nga tuig.
