Nagapangayo karon sang atensyon kag pagdangop ang mga empleyado sang Center Remnant nga nahamtang sa Central Market, ciudad sang Bacolod kay Mayor Evelio Leonardia angut sa pagpasara sa establisyemento.
Ini matapos nga nag-issue ang Bacolod City Legal Office (CLO) sang notice to vacate sa sulod sang pito ka adlaw sa occupant bangud nga gin-deny sang city government ang business permit sini.
Sa isa ka press conference sadtong Martes, July 21, ginpahayag ni Regin David nga gin-deny ang ila permit para mag-occupy sa block 136 bangud sa pahayag sang ciudad nga indi siya ang tagapanubli halin sa tag-iya kag wala man ini sang business permit para sa tuig 2018 kag 2019.
Ginpakilala pa ni Regin ang iya kaugalingon bilang apo sang nagtaliwan nga Rolando David Sr., nga siya naman ang naga-okupar sang bloke sumugod 1950 apang nagtaliwan ini sang nagligad nga tuig.
Dugang pa niya nga ginpasa sang nagtaliwan nga David sa iya ang “rights” para panag-iyahan ang nasambit nga negosyo.
Matapos nga gin-deny ang application, nag-file pa ini sang motion for reconsidenration pero antes pa man nasolbar ang isyu, gindagdagan na ini sang CLO sang notice to vacate.
Ginpahayag pa ni Regin nga ang iya first cousin nga naga-okupar sang block 134 ang nagsiling nga na-award na sa iya ang occupancy sadto pang October 5, 2019 apang suno sa iya wala man ini sang may mapakita nga sulat halin sa CLO nga nagapamatuod sang iya pag-okupar sa bloke.
Sa social media post naman ni Georelle Cabarles, isa sa mga empleyado sang Center Remnant, nagapangabay ini nga hatagan man sila sang atensyon ni Leonardia bilang amay sang ciudad.
Nagaapelar man ini sa alkalde nga indi pag-ipasara ang block 136 bangud dira sila naga-ubra kag nagasalig sang ila pangalabuhi-an para isagod sa ila pamilya.
Dugang pa sa Facebook post nga naga-isa sila nga mga empleyado kag kaapuhan ni David Sr. sa pagpakitluoy nga sa tunga sang pandemic, tani pamati-an man sila.
Bantug ang Center Remnant sa Bacolod bilang baligyaan sang lace kag mga butones.
Nahibalu-an nga may 11 ka empleyado ang nasambit nga negosyo kag ini ang nagatrabaho na sa ila sang halos 27 ka tuig.
Sa karon ginpahayag ni Regin nga gin-endorso na sang alkalde ang iya sulat sa CLO kag City Administrator’s Office. (Georelle Rubite Cabarles photo/Facebook)
