Davao City – Mainitong gidawat sa pamunuan sa 71st Infantry Battalion Philippine Army sa Comval Province Compostela ang pagtahan sa usa ka extortion collector sa NPA ug usa sa mga organizers sa rally dinhi sa siyudad nga si alyas Fiona, 42 anyos, minyo ug residente sa Barangay Saranga, lungsod sa Maragusan sa miaging adlaw.
Boluntaryo misurender kang Lt.Col.Esteveyn Ducusin, 71st IB Commander si alyas Fiona apan walay bitbit nga armas bandang 10:00 sa buntag niadtong adlaw’ng Martes.
Suma ni Lt.Col.Ducusin, si Fiona maoy tigpangulekta sa extortion activity diin sagad sa ilang gina-kilkilan sa mga negosyante, mga politiko, mga loggers, mga minahan ug tanang makulekta diritso i-remit sa ilang higher command sa teroristang CPP-NPA-NDF.
Kanhi usab nga sub-section secretary sa council of Hugpong Mag-uuma sa Walog sa Compostela si alyas Fiona.
Nalambigit usab si Fiona sa daghang rally dinhi sa siyudad sa Dabaw sama pananglitan sa rally Panacan niadtong 2014, rally sa Lapanday, rally sa lubong ni Parago, kontra sa balaud militar ug daghan pang uban.
Gitug-an niini nga ang iyang mga kauban sa pag-orgnisa sa mga rally mao sila alyas Nante, alyas Leni ug alyas Jing ug iya usab giangkon nga napugos kini sampa tungod sa mga saad nga maharuhay ang iyang kinabuhi apan nailad ra diay kini.
Sud sa lima ka tuig, nadaut matud pa ang iyang kinabuhi ug naguba sab ang ilang pamilya human sila misulod sa teroristang CPP NPA-NDF diin ang iyang bana na napreso gumikan sa susamang rason.
Gisaway ni Fiona ang kaharuhay nga kinabuhi sa ilang mga labaw samtang sila nag-antos sa kalisod sa pakigbisog kung asa dunay mga panahon gutmon sila nunot sa kakuwang sa suplay sa pagkaon.
Nagtuo si Ducusin nga dakong lama sa bahin sa teroristang CPP-NPA-NDF ang pagsurender ni alyas Fiona diin gipasalig sa opisyal nga andam ang militar sa pagdawat sa mga npa nga anaa pa sa kalihukan karon.
RadyoMaN Joel Viray
