Bukidnon – Gi-angkon sa New Peoples Army kon NPA nga sila ang anaa sa likod sa madugoong pagpang-ambush sa mga pulis ug mga sibilyan sa Ticalaan-Dominorog Road lungsod sa Talakag, Bukidnon kaniadtong Nobyembre 9, 2017 sa alas 6 kapin kon kulang sa gabie.
Sa sulat pamahayag ni Ka Malem Mabini ang tigpamaba sa NPA-NCMR gibutyag niini nga ang Mt. Kitanglad – Sub Rregional Command, ang mi-atake sa mga pulis kung asa nadamay usab ang sibilyan.
Gibutyag niini nga nga aduna usab silay nadagit nga mga hinagiban.
Gikasubo usab sa PNP ang pagkamatay sa ilang usa ka kauban nga pulis ug nadamay pa ang upat ka bulan nga babaye nga gikan sa panig sa sibilyan.
Una nang gikumpirma sa PNP 10 nga patay ang usa ka pulis ug upat ka bulan nga batang babaye samtang unom ang samaran human gi-ambush sa mga rebeldeng NPA ang patrol car sa Bumbaran Police Station sa lungsod sa Talakag.
Giila ang namatay nga biktima nga sila si SPO3 Arnel Carillo nga nadestino sa Bumbaran Police Station sa Lanao del Sur.
Samaron usab sila si SPO1 Pacifico Cabudoy; PO1 Nathaniel Ibal ingon man si PInsp Joven Acuesta ang hepe sa Bumbaran-PNP.
Una nang gikompirmar PNP 10 nga samaron usab ang mga iyaan sa namatay nga bata nga sila si Ali Citi, 53 anyos;Ali Aminsalam,37 anyos nga pulos nagpuyo sa Kili-kili,Wao,Lanao del Sur nga nadamay sa pag-ambush sa mga rebeldeng NPA.
Gikan sa usa ka conference ang grupo ni Acuesta samtang nagsunod usab ang pribadong sakyanan sa mga nasamdan sibilyan.
Sa karon padayon nga gigukod sa tropa sa gobyerno ang mao nga rebeldeng pundok nga naghimo ug pagpang-ambush.
