Sa interview sa RMN Malaybalay ngadto kang Dereka Magtanggol, Spokesperson sa NPA-Bukidnon, gibutyag niya nga ang duha ka gipatay sa NPA sumala pa gisilutan tungod sa pagpakigbatok sa hugpo.
Gipang-ila ang mga biktima nga silang Bibert Lapurhao ug Jerome Alba, pulos hamtong ang pangidaron nga sumala pa nagagiya sa mga operasyon sa mga kasundaluan ug mitraydor ngadto sa rebolusyonaryong kalihukan sa NPA.
Gamit ang tag-as nga kalibre sa armas, giatngan matud pa sa mga miyembro sa NPA ang duruha nga sakay og single motor ayha gitad-tad sa bala hinungdan sa kamatayon.
Taas na matud pa nga panahon ang gihatag sa duruha sa pag-undang sa sayop nga binuhatan batok sa NPA, apan nagmagahi matud pa kini hinungdan sa aksyong gihimo sa NPA batok sa duha ka mga biktima.
Gipahinomdoman na lamang karon sa NPA ang mga ahente sa AFP, ug sa mga intelligence niini, nga muundang na sa pagpakigbatok kanila tungod kay andam sila nga proteksyonan ang ilang gituohang ideolohiya ug manubag gayud kung magmagahi.
