Gideklarang persona-non grata sa katawhan sa Sitio Green Valley, Barangay Dalwangan ning siyudad sa Malaybalay ang mga New Peoples Army kon NPA kagahapong adlawa.
Sa interview sa RMN Malaybalay ngadto kang Lt. Col. Edgardo de Leon, ang commanding officer sa 403rd Infanty Brigade, Philippine Army gibutyag niini nga nagka-usa ang katawhan sa mao nga sitio nga dili e-welcome ang mga NPA sa mao nga dapit. Dili na matud pa nila kini pasagdan pa nga mubalik sa ilang komunidad.
Matud ni Col. De Leon nga nagbutang ug tarpaulin ang mga katawhan sa ilang Sitio Hall nga nakabutang ang mga linya nga nag-ingong “ Pahimangno sa NPA, ang Sitio Green Valley, Brgy. Dalwangan, Malaybalay City gipanalipdan ug protektado sa International Humanitarian Law, ayaw pasakiti o atakeha ang sibilyan ug ang ilang mga kabtangan.
Sa iyang habig, gisiguro ni Col. De Leon nga dili nila pasagdan ang mao nga lugar ug padayon ang ilang pagbantay sa katawhan nga nagpuyo dinhi.
Mahinumduman nga giharass sa mga NPA ang bag-ong detachment sa sundalo sa mao nga dapit kaniadtong Huwebes sa alas 9:45 sa gabi nga nagresulta sa 4 ka NPA ug 2 ka sundalo nga napatay sa engkwentro.
Gisiguro usab ni de Leon nga dili nila wad-on ang bag-ong kampo nga gitukod kay gihimo kini tungod sa hangyo sa mga residente.
