Davao City – Gituohang miyembro sa New People’s Army (NPA) ang mipusil-patay sa usa ka pulis alas-7 ganinang buntag, September 23, 2019 sa Purok 1-C, Igangon, San Isidro, Davao del Norte.
Sa interbyu sa DXDC RMN Davo kang Police Staff Sergeant (PSSg), Jehiel Lupos sa San Isidro Municipal Police Station (MPS), giila niini ang biktima nga si Patrolman Alfie Alcano, 28-anyos residente sa Purok 1- Centro, Brgy. Pinamuno, San Isidro ug na-destino sa 2nd Davao del Norte Provincial Mobile Force Company sa Malitbog, Panabo City.
Saysay ni Lupos nga nagmotor ang biktima sa dihang gisundan sab kini og lalaking nakamotorsiklo ug didto na gipusil ang pulis ug dead on the spot ang nahisgutan.
“Assassination sa NPA siguro, mao na among ginatutukan karon, liquidation sa NPA, sa pikas. Kay kining lugar gud namo diri gikonsidera as NPA-manifested area. So, kabalo naman ta sa panahon karon, kuan na ang pikas, kining eager na kaayo nga mubalos sa gobyerno kay mura’g nakuha-kuhaan pud sila,” saysay ni Lupos.
Dugang ni Lupos nga subay sa pamahayag sa asawa sa biktima, walay hulga nga nadawat ang iyang bana gani maayo og record si Alcano ug walay na-report nga duna kini gikasilo o nahimong kaaway.
Samtang, gikondena sa Police Regional Office (PRO)-XI ang kamatayon sa maong pulis ug gipasalig nga makab-ot ug mahatag ang hustisya sa pamilya sa biktima.
RadyoMaN Kirby Manzon
