Davao City – Magpatawag og emergency meeting ugmang adlawa ang City Health Office ug Public Safety and Security Command Center sa mga kapitan sa Coastal Barangays, Resort owners ug mga pool operators.
Sa interbyu sa RMN Davao kang CHO chief Dra. Josephine Villafuerte nga i-edukar nila ang mga recipients kalabot sa Polio ug unsay mga measures nga angay buhaton kontra sa maong balatian.
Nagpahimangno ang CHO sa mga resort owners nga adunay mga pool nga striktuhan ang ilahang mga rules una mutusmaw ug disinfect ang ilahang mga pool.
Gidili pod ang pagkaligo sa Davao river human nasayran sa resulta nga nagpositibo kini sa polio virus.
Karong Oktubre 14 ikasa sa Department of Health ang National Outbreak Response Immunization silbing aksyon sa pagbalik sa polio sa nasud human sa hapit duha ka dekada.
Libreng bakuna pinaagi sa patak ug dili injection batok sa polio ang itanyag sa gobyerno para sa mga batang nagedad 5 anyos pababa.
Giawhag ni Villafuerte ang mga ginikanan nga ipabakuna gayod ang ilahang mga bata sa mga barangay health centers ug adunay pod muadto sa mga balay-balay.
Matud ni Villafuerte nga makatakod ang polio ug ang mga sintomas niini, kalintura, pagluya sa kalawasan, pagsuka, paggahi sa liog, paghawoy sa mga kamot ug tiil. Makaparalisa ug makamatay ang maong sakit ug wala pa kiniy tambal.
RadyoMaN Aimee Guinita
