Davao City – Trese ka nga high powered firearms ang nasakmit sa militar sa sunod-sunod nga mga engkwentro nga natigayon ubos sa area sa 1003rd Infantry Raptor Brigade.
Gikumpirma ni 1003rd Infantry Brigade Commander Col. Nolasco Mempin nga usa ang natalang patay sa sakop sa Weakened Guerilla Front 56 NPA sa engkwentro tali 3rd Infantry Batallion Philippine Army niadtong Abril 7,2019.
Giila kini sa militar nga si Datu Kaylo Bontolan kinsa Deputy Secretary General sa Pasakaay Salugpungan Kalimudan-SMR (PASAKA-SMR) ug Council Member sa Salugpongan Ta’ Tanu Igkanogon (KRM-Talaingod).
Dugang niini nga nakuha usab sa mga encounter sites ang 2 ka mga granada, Improvised Explosive Devices kun mga IEDs, 3 ka mga .45 nga mga baril, subersibong mga dokumento ug uban pang mga kagamitan nga nahibilin sa mga niikyas nga sakop sa NPA.
Duha ka mga sundalo usab ang nasamdan sa engkwentro
Segun ni Mempin nga nikasa usab sila karon og intensified nga mga checkpoints sa pakigtambayayong sa kapulisan.
Gipasidunggan niini ang kasundaluhan sa malampusong mga operasyon.
RadyoMaN Aimee Guinita
