Patay ang usa ka miyembro sa Communist Party of the Philippines – New Peoples Army kon CPP-NPA sa nahitabong engkwentro kagahapon.
Sa interview sa RMN Malaybalay ngadto kang Cpt Norman Tagros, ang civil military operations officer ug spokesperson sa 403rd Infantry Brigade, Philippine Army, gibutyag niini nga nahitabo ang engkwentro tali sa kasundaluhan ug NPA sa Brgy, New Eden, Pangantucan ning lalawigan alas 9 sa buntag kagahapon.
Nagpahigayon matud pa sa security patrol ang 1st Special Forces Battalionsa mao nga dapit human nga nakadawat ug taho ug reklamo sa gihimo matud pang pagpangilkil ug pugos nga pagpang-recruit sa mao nga dapit.
Muabot sa 30 minutos ang binayloay sa bala atol sa naka-engkwentro ngadto sa 10 kapin kon kulang ka mga NPA nga ilawom sa Gerilla Front 68 sa CPP-NPA’s North Central Mindanao Regional Committee.
Human sa mao nga panghitabo, narekober sa AFP ang usa ka M16 rifle nga M203 Grenade Launcher, usa ka M16 rifle, usa ka M14 rifle, usa ka barrel sa M60 Machine Gun, eight anti-personnel mines, usa ka hand grenade, ug assorted live ammunitions.
Samtang habig sa kasundaluhan, 2 ka sundalo ang naka-angkon ug samdan atol sa engkwentro nga dali usab nga gidala sa military hospital sa Camp Evangelista sa Cagayan de Oro City, ug anaa na sa luwas nga kahimtang.
