Nag-agbat na usab ang mga dalan sa tropa sa 23rd IB Phil. Army ug mga rebelding New Peoples’ Army (NPA) nga miresulta sa sinukliay ug mga bala sa bukirang bahin sa Brgy. Segunda, Esperanza, Agusan del Sur.
Ang maong bakbakan nagbilin ug usa ka patay’ng lawas sa wala pa mailang sakop sa NPA, samtang laing sakop sa rebelding grupo ang nadakpan usab sa tropa sa goberno uban sa daghang mga armas ug anti-personnel mine ang nakompiska human sa engkwentro.
Gibutyag ni LTC Francisco Molina, Jr., commander sa 23rd IB Phil. Army nga naglusad ug combat operation ang kasundaluhan sa maong lugar human nadawat ang impormasyon gikan sa mga residenti nga adunay mga rebelding NPA ang nagpahigayon ug lektura ug extortion activities sa bisinidad sa Brgy. Segunda.
Milungtad sa 5 minutos ang pagsukli-ay sa mga bala nga miresulta sa kamatayon sa usa ka NPA nga gitoohang sakop sa Guerilla Front 88 sa NPA North Central Mindanao Regional Committee (NPA NCMRC).
Walay nasamdan sa panig sa military samtang gitugyan na ngadto sa local nga kagamhanan sa Esperanza ang patay’ng lawas sa NPA.
Samtang ang usa ka membro sa NPA nga nadakpan giturn-over na usab sa kwerpo sa kapulisan alang sa pagpasaka ug kasong criminal batok kaniya. [image: esperanza.jpg]
