Davao City- Gimuntar sa kapulisan ang usa ka Special Investigation Task Group nga mututok karon sa imbestigasyon sa pagpusil-patay kang Barangay Mabantao, Kapalong, Davao del Norte Kapitan Edgar Allan Quilla.
Sa interbyu sa RMN Davao kang Police Regional Office XI spokesperson Police Major Eudisan Gultiano, nga posibleng mga sakop sa New People’s Army (NPA) ang nipusil sa biktima.
“We are not discounting the possibility na maaring kagagawan ito ng rebeldeng grupo. We received information na itong mga rebeldeng grupo ay magka-conduct ng violent attack against our police, army and including mga barangay officials,” matud ni Gultiano.
Segun ni Gultiano, aktibo ang kapitan sa pagsuporta sa mga programa sa gobyerno kontra CPP-NPA.
Lakip pa sa mga gilantaw nga mga anggulo sa SITG Quilla ang personal ug pulitika.
Matud sa mga nakasaksi sa krimen, alas-4:55 sa hapon niadtong Pebrero 1, 2021, naglingkod ang kapitan sa tindahan niini ug niduol ang gun man nga kunuhay magpa-car wash ug kalit nga gipusil ang biktima sa nagkadaiyang parte sa lawas niini.
Dali nga misibat ang suspek sakay sa usa ka pula nga Honda TMX Bora-bora motorcycle nga gidrayban sa lain pang unidentified nga lalaki.
Gidala ang biktima sa Davao del Norte District Hospital-Kapalong Zone apan didto na kini nakabsan sa kinabuhi samtang ginatambalan.
Gipaalerto na ang tanang kapulisan ni PRO XI Director Police Brigadier General Filmore Escobal human tulo na ka mga kapitan ng gipamusil-patay sa Davao Region sukad Enero ning tuiga.
RadyoMaN Aimee Guinita
