General Santos city—Grupong NPA ang gitudlo sa mga sundalo sa gobyerno nga maoy responsabli sa pagsunog sa mga ekwepo nga gipanagiyahan sa FFGG Construction nga nahimutang sa Sitio Malabinwang, Balangunan Jose Abad Santos Davao Occidental alas 11:00 pasado ang takna sa kabuntagon niadtong adlawng Sabado.
Sumala pa ni 1st Lt Jerry Maborrang, ang tigpamaba sa 73rd Infantry Battalion, Philippine Army nga mukabat sa 7 ka mga suspect ang misulong sa lugar dayon gipanaug ang mga operator sa usa ka backhoe ug water tanker dayon gikuha ang mga cellphone niini ug didto gisunog sa mga nasangpit ang ekwepo.
Gilayong misibat ang mga suspect padulong sa wala matinong diriksyon dala ang mga gamit sa mga operator.
Dugang pa ni 1st Lt. Maborrang nga human ang maong pagpanunog gipabusikad dayon sa mga nasangpit nga NPA ang usa ka IED nga ilang gibutang sa kilid sa dalan sa Sitio Waay, Barangay Rio Del Pilar Glan Sarangani Province.
Nag tuo ang kasundalohan nga target sa maong roadside bombing ang mga mi-respondeng tropa sa goberno sa gisunog nga mga ekwepo Sa Jose Abad Santos.
Walay naangol sa maong insidenti human nga nibusikad ang IED sa wala pa miagi ang mga sundalo sa lugar.
Sa karon nagpdayon ang gihimong imbistigasyon sa maong insidenti.(Dave Silagan)
