NPA ‘terror tag’ drama lang

Davao City – Mas mahagit pa ang CPP-NPA-NDF sa pagmugna og kasamok karon nga gideklara na sila nga teroristang grupo ni Pres. Rodrigo Duterte.

Sumala ni kanhi Alliance for Nationalism and Democracy (ANAD) Partylist Congressman ug karon Cebu City Councilor Jun Alcover nga mas mugara ang CPP-NPA-NDF sa pagsabwag og kagubot karon nga giila na sila nga mga terorista.

Segun ni Alcover nga mas musamot pa sila og pangatake dili lang sa mga sundalo ug mga pulis apan lakip na sa mga sibilyan hilabi na nga nagsingabot ang selebrasyon sa CPP-NPA-NDF.


Nasayop matud pa og pangagpas ang gobyerno nga kun madeklara nga terorista ang CPP-NPA-NDF disbentahe na kini kanila apan sa pagkatinuod dako kining advantage sa propaganda sa mga komunista.

Labaw na nga malisod kun ipadakop ang mga militante gumikan puwede kininilang gamiton nga pangsugnod sa pag-agni sa kadaghanan aron makigbatok sa gobyerno.

Gibatbat ni Alcover nga kun gusto makig-away ang kagamhanan sa CPP-NPA-NDF, dili pinaagi sa baril apan ipaagi sa pagpukan sa ideolohiya sa mga kumunista aron dili na kini mukanat pa.

Matud sa konsehal nga kun walay direksiyon ang namuno sa kagamhanan, musangko gayod kana ngadto sa kagubot butang nga gikabalak-an og maayo sa anti-communist crusader.

Nagduda si Alcover nga drama lang ni Duterte ang pagdeklara sa CPP-NPA-NDF nga mga terorista aron dunay rason sa pagtukod sa revolutionary government sa Pilipinas.

Karon pa lang daan masulti na niini nga dili magmalinawon ang kasaulugan sa pasko ug bag-ong tuig tungod kay siguradong mu-ulbo gayod ang binakbakay tali militar ug CPP-NPA-NDFP.

RadyoMaN Joel Viray

Facebook Comments