NTC-XI: Facilitated sim card registration malampuson

Davao City – Nahimong produktibo ang gilusad nga facilitated Subscriber Identity Module (SIM) card registration dinhi sa Davao Region diin kini gi-pilot sa Malalag, Davao del Sur niadtong Miyerkules, Enero 25, 2023.

Sa interbyu sa DXDC RMN Davao kang Nelson Cañete, Regional Director sa National Telecommunications Commission (NTC)-XI, gibutyag niini anaa ang tulo ka mga dagkong telecommunication companies atol sa aktibidad.

Sumala ni Cañete, human sa Malalag, target nga himuon ang SIM registration sa Kiblawan, Laak ug sa tanang remote areas sa Davao Region.

“Diri sa Region XI, ang atoa successful ‘ta. Pero kana lagi ang problema kay adunay daghang areas nga wala gyud tawo’y internet signal. Mao nay nakapa-delay gamay sa registration tungod kay online man ang atong registration,” sulti ni Cañete.

Gipanawagan sa NTC-XI official ang mga SIM card holder nga magparehistro na aron dili ma-deactivate ang ilang mga SIM card pag-abot sa deadline sa June 27, 2023, subay sa implementing rules and regulations (IRR) sa balaod.

RadyoMaN Kirby Manzon