NTC XI padayon nanawagan sa publiko i-rehistro na ang ilang SIM card

Davao City- Subling nagpasidaan karon ang National Telecommunication Commission (NTC) Davao Region nga hangtod ugma sa gabii (Martes) na lang July 25, 2023 ang extension sa Mandatory Subscriber Identity Module (SIM) card Registration.

Sumala ni NTC XI Regional Director Nelson Cañete, inig-abot sa 12:00 sa tungang gabii July 26, 2023 (Miyerkules), hingpit nang humanon ang mandatory SIM card registration ug human niana, ang Department of Information Technology Commission (DITC), dili na muhatag pa og laing extension sa rehistrasyon sa sim, busa ning nabiling mga oras, gi-awhag sa opisyal ang mga subscribers sa mga telcos nga muadto na sa portal, aron makaapas pa sa rehistrasyon sa ilang mga SIM.

Sigun ni Director Cañete, ang tanang SIM card nga wala marehistro awtomatiko nang ma-deactivate ug tanang apps sa cellphone, dili na kini magamit kon ma-access pa.

Sa kasamtangan, mukabat na sa 104 milyones, gikan sa 169 milyones ka SIM card ang na-rehistro, diin pinakadaghan sa mga narehistro mao ang Smart Network, gisundan sa Globe Network, ug ikatulo mao ang DITO Network.

RadyoMaN Joel Viray