RMN Laoag – Ballaigi a nagun-od ti kampeonato ti Nueva Era kadagupan iti 21 nga ili iti kalkalpasna a Tan-ok ni Ilocano Festival – maysa a prestihiyoso a kompetisyun – panagrambak iti amianan a Luzon kangrunaanna iti Ilocos Norte.
Nabayagen a kinalikagoman ti grupo ti Nueva Era a magun-od ti kampeonato sipud a nangrugi ti nasao a kompetisyun. Imabuyada iti nabaknang a kultura dagiti ‘Tinggian’ a taga Indaya ken Inlaud iti nasao a lugar.
Ballaigi met a nakagun-od ti Second Place iti La Virgen Milagrosa Festival iti ili ti Badoc nu sadino ket naipakitada iti kinabileg iti Birhen nga Puon ti Ragsak iti probinsya babaen iti panagkiddaw iti milagro kadagiti naruay a parikot ken pagkurkurangan.
Nagun-od met ti 3rd Place iti syudad ti Batac. Impabuya ti Batac iti ramen iti panagaramid ti Empanada ken kasta pay nga impakitada nu kasanu ti agrambak babaen iti taraon ken bendisyon a sagsagrapenda.
Nagbalin met a runner-up dagiti il-ili kas iti Kangayedan Festival ti Pagudpud, Ginginubat Festival iti Adams a dati a kampeon,Ritritemon Kayong Festival iti Sarrat, Abuos Festival iti Banna ken Siwawer Festival iti ili ti Vintar.
Inyalat pay iti ili ti Nueva Era ti Best in Festival Music, Best in Production Design ken Best in Choreography and Direction. Best in Video Design met iti syudad ti Batac.
Best Female Performer ni Judilia Pucan napipud iti syudad ti Batac ken Best Male Performer met ni Cedie Cainglit iti Badoc, Ilocos Norte.
Ti Tan-ok ni Ilocano Festival of Festivals ket binukel ti gobyerno probinsyal iti panangidadaulo ni Governor Imee Marcos kaduana iti Tourism Office babaen kenni Mr. Aian Raquel (Provincial Tourism Officer), ken iti Communications and Media Office (CMO) iti met panangidadaulo ni Mr. Jun Arvin Gudoy ken Ms. Rhona Ysabel Daoang.
Bernard Ver, RMN News
