Ya promote el nuevo instolao hefe del Sta. Maria Police Station 7 que hay continua le con el maga buen programa y trabajo que ya deja el antes hefe Chief Inspector Joseph Ortega.
Asegun con Chief Inspector Rolly Joaquino, grande su confianza cay fuede lang le porsigui con el mga initiative del antes hefe del mentionao estaccion porcausa cay ledyao ya le con el su trabajo y firmi sila chene comunicaccion de Ortega cuando ele designao na Operations Branch del policia local.
Si Joaquino ya abla cay nuay problema para conele el conducta del responsibilidad porcausa cay ya dura ya le designao na otro-otro mga posisyon na ZCPO lo mismo na field works tambien ele firmi.
Ya rendi Tambien gracias si Joaquino con el Alcalde Beng Climaco por el confianza ya dale conele para encaveza coneste estaccion de policia donde el barangay ta esta el residencia del alcalde.
Na mensaje del hefe del policia local Chief Supt. Neri Vincent Ignacio, ele ya abla con Joaquino para continua mga buen trabajo na aspeto de seguridad del fueblo y mga vivientes, queda agresivo na campanya contra droga y crimen bajo na su jurisdiccion. – *Bhong Simbajon/RMN News*
