General Santos City—Dakpan sa gipahigayong operation sa mga warrant officers sa Police Station 4 ang gikunsiderang no. 5 most wanted person sa ilang area of responsibility.
Suspek nailang si Juanito Montaño 26 anyos nga taga Brgy Mabuhay ning syudad. Sumala ni PO2 Warlito Brigonalo- warrant officer sa Police Station 4 kasong lugos ang atubangon suspek nga karon anaa nabalhog sa selda sa prisinto.
Dugang pamahayag ni PO2 Brigonalo nga dugay-dugay na usab nga ilang gipangita ang suspetsadong si Montaño apan human silang nakadawat ug impormasyon nga anaa ang presensya sa suspek didto sa Brgy Mabuhay gilayon nilang gilusad ang operasyon.
Naabtan matud pa ang suspek nga naghigda sa usa ka barber shop sa waong lugar ug wala na mipalag dihang ilang gidakop. Ila man usab matud pang giagi sa tukmang proseso ang pag-aresto sa suspetsado ug didto na lang niini tubagon sa korte ang akusasyon kaniya.
Samtang sa nahimong pakighinabi sa RMN Gensan ngadto sa suspetsadong si Juanito Montaño hugot niining gibarugan nga wala sya makahimo sa pagpanglugos sukwahi sa akusasyon batuk kaniya.
Sumala sa suspek nga igo lang gyud syang giangin sa maong panghitabo apan wala sya miapil sa pagpanghilabot sa babayeng biktima. Aminado hinuon si Juanito nga nakaila siya sa mga mihimo sa krimin tungod usa kanila ang iyang kanhing kauban sa trabaho apan wala matud pa syay kalabutan niini. (Jordan Britos)
