Grande omento na numero del mga vehiculo que ta corre na maga camino y ta contribuji na fesadez del trapico amo el mga motorista desdel otro mga provincia que ta endereza aqui na ciudad para mira y entretene na mga actividades del ciudad por el Zamboanga Hermosa Festival.
Asegun con el hefe del Traffic Division Chief inspector Raymond Sanson, base na diila monitoring, doblao aura el mga numero del mga de otro lugar vehiculo que ta corre na de aton mga camino que ta visita lang aqui na ciudad. Este base na mga chekyada del mga plate number codes que ta fuede nota el su mga traffic personnel designao na mga interseksyon.
Mas omentao asegun el numero de estos mge vehiculo, especialmetne si ta llega el dia de Sabado y Domingo donde ta enggaña el mga visita anda na mga mall y man compre. Chene de estos ta fuede sila determina que hinde de aqui, cay ta fuede conesos cuji na mga lugar donde considerao “No Entry” y mga “One Way” camino, porcausa cay sila nosabe que este tiempo chene kita mga provision y amendamiento na tal ley na camino.
Apelo de Sanson con el mga motorista para mantene el disciplina na camino y respeta con el ley trapico. – *Bhong Simbajon/RMN News*
