Walang iniulat na nasawi ang Office of Civil Defense (OCD) sa nangyaring pagbaha sa Davao Region dahil sa malakas na pag-ulan.
Sa huling datos ng OCD, humupa na ang baha sa 23 mula sa 25 lugar na binaha.
Apektado rito ang mahigit 14,000 pamilya o mahigit 61,000 indibidwal, kung saan 451 pamilya o 1,700 indibidwal ang kasalukuyang nasa iba’t ibang evacuation center.
Samantala, base pa sa datos ng OCD ay tinatayang mahigit sa P105 million ang pinsala sa agrikultura; habang limang bahay ang iniulat na nagtamo ng pinsala at dalawang bahay ang tuluyang nawasak.
Kaugnay nito, nakapagpamahagi na ang pamahalaan ng tulong pinansyal o P2.6-M sa mga apektado ng malawakang pagbaha sa Carmen, Davao del Norte sa pamamagitan ng Department of Social Welfare and Development Region 11.
