Davao City – Wala pay namonitor nga grabeng pagbaha ang Office of the Civil Defense 11 (OCD-XI) subay sa gipagulang advisory sa Davao City Disaster Risk Reduction and Management Office (CDRRMO)-Operation Center may kalabutan sa hingpit nga pagsulod ni Tropical Depression Samuel sa Philippine Area of Responsibility (PAR).
Sa eksklusibong pakighinabi sa DXDC RMN Davao kang OCD-XI spokesperson Franz Irag, tulo ka mga probinsiya ang anaa sa DILG codex list of potential risk areas – Compostela Valley, Davao Oriental ug Davao del Norte diin sa pagkakaron, aduna nay nasinatiang pag-ulan ang Comval area.
Matud niini, hugot nilang ginamonitor ang Agusan river nga nakakonekta sa Maragusan paingon sa Agusan, diin tulo ka mga munisipyo ang posibleng maapektuhan sa ComVal.
Hinuon, normal level ang Tagum-Libuganon River.
Samtang, ginamonitor sab ang kasapaan sa Bangangga, Cateel ug Caraga diin ang Coastal area sa Davao Oriental posibleng makasinati og storm surge.
“Special concern nato ang mga identified landslide and flood-prone areas labi na nag-issue ang MGB two months ago og landslide and subsidence threat advisory sa Davao Oriental ug Compostela Valley mao nang gipa-special concern nato sa ila ug gipatutukan og pag-ayo diin kinahanglan maka-preemptive evacuation na kadtong mga identified families nga duol sa naay threat advisory for landslide,” saysay niini.
Base sa gipagulang advisory sa weather bureau, posibleng magsugod og busdak ang ulan dinhi sa Davao Region karong buntag o bin ba kaha sa hapon.
Hinuon, nakahimo na og pre-disaster risk assessment uban ang NDRRMC tumong nga lantawon ang mga posibleng areas ilawom sa rehiyon nga labihang maapektuhan ni Bagyong Samuel.
Sugyot ni Irag ngadto sa katawhan nga padayon magmaigmaton, motuman sa mga tugon sa otoridad ingon man mag monitor sa mga updates sa hingtungdang ahensiya aron malikay sa delikadong kahimtang.
RadyoMaN Jason Amisola
