Davao City – Gikumpirma sa Office of the Civil Defense (OCD-XI) nga nagbaton na sila karon og pagpangandam sa La Niña nga nasinatian na karon Davao Region sa Mindanao ug ubang bahin sa nasod.
Sa interbyu sa DXDC RMN Davao kang Angie Lina Payosalan, Information Officer sa OCD-XI, gibutyag niini nga nagpahigayon na sila og Pre-Disaster Risk Assessment (PDRA) kauban ang PAGASA (Philippine Atmospheric Geophysical and Astronomical Services Administration), Mines and Geosciences Bureau (MGB), Department of the Interior and Local Government (DILG) ug uban pang Response Team Agencies.
Matud ni Payosalan nga ilang gisuta ang mga posibleng kadaot nga hatud sa La Niña partikular na dinhi sa Mindanao ug gipaniguro ang ilang ka-andam uban ang Regional Disaster Risk Reduction and Management Council (RDRRMC)-XI.
“Gi-assess namo ang mga hazard dulot (hatud) aning La Niña particularly diri sa Mindanao nga nakasinati ‘ta og mga pag-ulan, moderate to heavy rain pagsugod gyud sa ‘ber’ months,” saysay ni Payosalan.
Subling gipahinumdom sa OCD-XI official sa publiko nga kanunay’ng mag maigmat, mag-andam og ‘Go Bag’, pagmonitor sa saktong inpormasyon ug pagtuman sa mando sa awtoridad.
RadyoMaN Kirby Manzon
