OCD XI: Dugang pahimangno sa mga angay buhaton panahon nga aduna’y linog

Davao City – Giklaro sa Office of the Civil Defense XI (OCD) nga mamahimong makagawas gikan sa mga building o establisyemento ang katawhan atol sa mismong pagtay-og kung aduna’y linog nga masinatian.

Sa interview sa DXDC RMN Davao kang OCD XI Information Officer Franz Irag sa Serbisyong Straight to the Point kauban si RadyoMan Renz Barbarona, iyang gibutyag nga ang pinakasakto nga buhaton base sa international standard mao ang pag-perform sa naandang ‘duck, cover, and hold’.

Apan, kung ugaling makita nga karaan ug delikado na nga pundohan ang maong building, kung kaya nga makabarog, makalakaw, ug masiguro nga matabunan ang likod ug ulo, mamahimong mugawas dayon samtang nagapadayon pa ang pagtay-og.

Kahinumduman nga niining September 2023 lang, nabati sa Davao City ang 4.8 nga linog ug ang magnitude 6.8 nga niigo sa Morocco nga nikalas og dul-an 2,000 na nga kinabuhi.

Subay niini nanghinaut ni Irag nga ma-apply sa publiko ang napraktisan sa earthquake drill nga mga safety measures aron luwas ang tanan sa disgrasya.

“Kami sa OCD kauban ang mga agency sa local DRRM, amoa jud nang gipahingsugan nga ato jud nang makat-unan, mabutang sa kasingkasing, hunahuna ug mahimong muscle memory sa atong lawas ba nga kung unsay buhaton kung naay linog, perform duck, cover, and hold technique,” segun ni Irag.

RadyoMan Ivy Parido