Davao City – Nunot sa walay kahumanan nga kalamidad sama sa bagyo ug linog nga muigo sa pipila ka dapit dinhi sa rehiyon onse sa matag tuig.
Ang Office of the Civil Defense-Davao Region (OCD-XI) kanunay galusad og technical training sa local government unit sa kalungsuran ug kasiyudaran sa rehiyon sanglit unpredictable ang kalamidad ning panahona.
Gipamahayag ni OCD-XI Spokesperson Franz Irag nga buot nilang mahasa ug maandam ang matag LGU diha sa pagresponde ug paggamit sa pundo alang sa kalamidad.
Gisulti ni Irag nga aron paspas ang paghatud sa impormasyon, usa ka water monitoring system ang gibutang sa mga tulay ug kasapaan samtang ang warning device anaa sa mga barangay.
Ang water monitoring system dunay kapasidad magmonitor sa water level sa kasapaan diin ang warning device magtino kun angay na bang maghikling ang mga residente sa ilang mga pinuy-anan.
Kung si OCD-XI Spokesperson Franz Irag pasultihon, sobra na ka-andam ang katawhan sa bisan unsa nga kalamidad nga muigo sa atong dapit gumikan sa gi-implementar nga mga programa kontra kalamidad.
Gidasig ni Irag ang katawhan nga magbantay sa tanang panahon ug magkooperar sa preemptive evacuation nga ipatuman sa mga barangay opisyals ug sa lokal nga kagamhanan.
Nagsumikad ang pamahayag ni Irag gumikan sa nahitabo nga ipo-ipo sa South Bay, Jerome, Agdao ning siyudad kung asa pipila sa mga balay nangaguba ug 400 ka tawo ang apektado.
RadyoMaN Joel Viray
