Davao City – Pito ka mga barangay sa Rehiyon 11 ang nagpatuman og pre-emptive evacuation gumikan sa makusog nga ulan nga dala sa trough sa Low Pressure Area (LPA) nga miresulta sa mga pagbaha.
Base sa natala sa Office of the Civil Defense 11 (OCD-XI), apektado ang napulo ka mga pamilya sa Brgy. Abejod ug Brgy. Mainit sa Cateel, Davao Oriental samtang 572 ka mga indibidwal ang apektado sa Compostela Valley Province nga naggikan sa Brgy. Magsaysay sa Nabunturan, Brgy. Aguinaldo sa Laak, Brgy. San Miguel ug Brgy. Tamia sa Compostela, ug Brgy. Diwata sa Monkayo.
Sumala ni OCD-XI spokesperson Franz Irag, gipahiluna na ang maong mga pamilya sa nagkadaiyang evacuation centers sa ilang mga lugar diin nagpadayon usab ang ilang hugot nga monitoring.
Samtang naka-‘on-duty call’ ang mga opisina sa Quick Response Team sa DSWD panahon nga mahitabo ang bisan unsang kalamidad ingon man nagpadayon ang ilang repacking sa mga food packs aron ipang-apod-apod sa mga apektadong pamilya ingon man andam usab ang Disaster Standby Fund nga P3-M kung magkulang ang ilang supply.
RadyoMaN Jason Amisola
