OCD-XI: Residente angay hibal-on kung risgo ang ilang lugar sa kalamidad

Davao City – Gipasabot sa Office of the Civil Defense (OCD)-XI nga dako og papel ang mga residente sa pagsayud kung luwas ba o delikado sa kalamidad ang gitukuran sa ilahang mga pinuy-anan.

Sa interview sa DXDC RMN Davao kang Ednar Dayanghirang, Regional Director sa OCD-XI, iyahang gisaysay nga angay nga pangandaman kanunay ang kalamidad sama sa mga pagbaha ug pagdahili sa yuta.

Matud ni Dayanghirang, kagahapong adlawa, Marso 1, 2024, dunay reported flooding sa Malita ug Sta. Maria, Davao Occidental, diin gatusan ka mga residente ang gihikling sa evacuation centers.

Pahimangno sa OCD-XI official nga mag-igmat ug makig-alayon sa barangay, sa gobyerno panahon sa emerhensiya ug bisan sa mga lakang aron malikayan ang kadaut nga posibleng ihatud sa kalamidad.

“Ang atong pahimangno is kung pwede maglikay, likayan lang gyud (ang delikadong lugar). Kung makabalhin o makapangita og laing luna or mangayo og tabang sa barangay, sa munisipyo, sa province or even sa national (government) kung wala moy kabalhinan. Magpresentar, magpalista,” saysay sa OCD-XI official.

RadyoMaN Kirby Manzon