PALO, LEYTE – Naka-schedule na an pagbubuhaton nga konsultasyon han Office of the President ha mga Post-Yolanda projects ha lima nga probinsya ha Eastern Visayas.
Ha ginbuhat nga Regional Briefing and Orientation for the Provincial Grassroots Consultation kakulop ha buhatan han NEDA Region 8 kaupod an kadam-an nga mga Regional Directors han mga ahensya han gobyerno, mga LGU officials, nga gin-pamunuan ni Presidential Assistance for Special Concern Usec. Wendel Avisado, iya gin malatumat nga an konsultasyon in mag-iinvite hin 120 nga partisipante nga tikang ha mga benepisyaryo, LGU officials, ngan mga representante han civil society organizations.
Dugang pa han opisyal, seryoso an Presidente nga panginanu-on an kada ahensya han gobyerno ngan tagan hin solusyon an kada issues ngan concerns han mga Yolanda survivors ha mga Post-Yolanda projects.
Nag-alotaga an opisina han Presidente hin budget ha pagdumara han mao nga kunsultasyon.
Magtitikang an kunsultasyon ha syudad han Tacloban nga pag udumaraon ha Marso 19-20. Susundan ini ha Guiuan, Eastern Samar nga pag dudumaraon ha Abril 3, Balangiga Eastern Samar ha Abril 4 , Basey Samar ha Abril 10, Carigara, Leyte ha Abril 11, Isabel, Leyte ha Abril 12, Naval, Biliran ha Abril 17, ngan Silago, Southern Leyte ha Abril 19.
Iimbitaron gihapon an mga kahagrani nga mga bungto ngan syudad agud umatinder ha pagbubuhaton nga konsultasyon.
