Davao City – Nahimong emosyunal ang pagtambong ni Melanie Alcaria, 24 anyos, atol sa komemorasyon sa ika-16 nga anibersaryo sa Davao Old Airport Bombing adlaw’ng Lunes, Marso 5, sa mismong blast site.
Gisaysay niini atol sa interbyu sa RMN Davao nga ang iyahang amahan nga si Miguel Alcaria, porter, ang usa sa 22 nga mga namatay sa trahedya niadtong Marso 4, 2003.
“Naka-survive pa akong papa og pila ka hours namatay siya March 5 didto sa San Pedro Hospital, grade 2 pa ko ato,” sumala ni Melanie.
Matud ni Alcaria nga usa na ka engineer karon nga dako ang iyahang pasalamat sa lokal nga panggamhanan sa pagsuporta sa ilahang pamilya.
“Sa tabang sa gobyerno graduate pod akong ate og BS food technology naa na siya sa Dubai karon ug ako Civil Engineer bag-o ra pod ko naka-graduate ug nakaluy-an pod sa Ginoo nakapasar ko last November 2018 nga board exam,” matud niini.
Samtang, gibutyag ni CSSDO Asst. Dept. head Marilyn Agonia nga 31 na ang nakalampos sa kolehiyo ug 12 nalang
ang padayong ginapa-eskwela karon sa gobyerno.
“On going ang atoang pag-provide sa ilaha’g assistance sa kadtong mga dependents kay ilahang mga parents dili na makapadayon og gasto, so the City Government provided an educational assistance,” segun ni Agonia.
Matud ni Agonia pipila sa mga kwalipikadong dependents ang nahatagan og oportunidad nga makatrabaho usab sa lokal nga panggamhanan.
RadyoMaN Aimee Guinita
