Davao City – Gi-rekomendar karon ni former Davao City Chamber of Commerce and Industry, Inc. (DCCII) President Antonio Dela Cruz ang pag-review sa karaan na kaayong National Building Code.
Matud ni Cruz, obvious nga dili na applicable ang obsolete standards kaniadto diha sa maong balaud kun hisgotan ang katukoran sa nagkadaiyang mga modernong imprastraktura.
Ehemplo niini mao ang pagkahagsa sa natukod nga pioneering condominium nga Ecoland 4000 Residences ug pagkagun-ob sa mga tulunghaan ug gambalay sa gobyerno bunga sa sunod-sunod nga linog nga miigo sa Mindanao niadtong October ning tuiga.
Sumala ni Dela Cruz, dili haom ang kasamtangang Building Code sa nasud ug kinahanglan nang usbon ug bag-uhon ang standards sa pagtukod og mga gambalay sama sa condo units aron maseguro nga lig-on ug makabarog kini bisan sa gikusgon nga Magnitude 10 earthquake.
Matud ni Dela Cruz, angay istriktohan ug susihon og maayo sa City Engineer’s Office ug sa Office of the Building Official ang mga developers ug ang mga contractors kung nasunod ba gayod nila ang standards sa mga materyales nga ilang gigamit sa pagtukod og gambalay.
Kahinumdoman nga walo ka mga condominium units sa dakbayan ang gi-isyuhan og Notice to Vacate samtang napulo ka eskwelahan dili na usab luwas pang okupahan gumikan sa mga liki diin peligroso kini nga mahugno na sa hingpit kung mahitabo pag-usab ang makusog nga paglinog.
Samtang gibatikos sa kanhi pangulo sa mga negosyante sa Davao ang DPHW-XI gumikan sa mga alegasyon sa dili maayong kalidad sa mga gitukod nga infrastructure facilities sama niadtong naguba nga DPWH Office nila didto sa Malita, Davao Occidental.
Gihagit usab ni Dela Cruz ang mga kadagkuan sa public works agency nga ma-address ang alegasyong kurapsyon diha sa mga infra projects aron wala nay kinabuhing makalas panahon nga mahagsa ang mga edipisyong maapektuhan sa grabeng pagtay-og.
RadyoMaN Joel Viray
