TACLOBAN CITY – Padayon nga nasunod iton mga motorista ha syudad han Tacloban ha one way traffic scheme nga ginpatuman dida han desyembre 4 han nakalabay nga tuig. Mayada mga motorista nga naayon hini nga bag-o eskima ha trapiko, mayada liwat diri.
Pakiana han pipira, san-o matatapos ini nga one way traffic scheme.
Sumala han TOMECO, kutob nala ini yana katapusan nga adlaw han enero ngan sumala kan Noli Naval, namamangulo han TOMECO posible hira magpasaka hin ordinansa ha Sangguniang Panlusod para mapadayon ini nga eskima.
Gin-obserbahan man gud han mga otoridad an dalagan han trapiko ha syudad sanglit kun may final na nga report nga ipapasa nira kan Tacloban City Mayor Cristina Romualdez, dida makikita an resulta kun naibanan ba an pagbugi-ot han trapiko ha kadalanan.
Dugang pa han opisyal posible nga mayada na liwat pagbabag-o ha traffic scheme.
Padayon nga gin-iistudyuhan partikular an dalagan han trapiko ha downtown area nga ansya mismo it kasagaran ginbabaybay han mga motorista.
