Davao City- Arestado ang 11 ka mga tao nga adunay kaso human nasikop sa gilusad nga ‘Oplan Bulabog’ kun Joint Anti Criminality Terrorism Operation natigayon kagahapong adlawa, Enero 3, alas 6:00 sa buntag.
Subay sa datos sa Davao City Police Office (DCPO), sa 1,550 ka mga indibidwal nga gipailawom sa identification check ug profiling, 1,422 ang adunay ID, 128 walay ID ug 11 ang arestado diin ang mga dinakpan giila nga mao sila Arnold Viñas sa kasong Frustrated Murder, Michael Galera sa kasong Qualified theft, Ramon Araula sa kasong simple theft , Leonardo Lanticse ug Alito Aquinas sa violation sa PD 1602, Dave Carasco sa kasong Robbery, Cathleen Tapon sa kasong Qualified theft, Angel Ansaldo sa violation sa RA 7610, Rolando Dolores sa kalapasan sa anti-smoking ordinance sa syudad,Jimmy Gimo kasong Theft ug Antonio Tobal sa kasong Robbery.
Dugang niini pito usab ang na-isyuhan ug T.O.P alang sa minor Traffic Violations gani dungan sa gilusad nga ‘Oplan Lambat Bitag Sasakyan’, duha ang nakumpiskahan og lisensya samtang lima ang na-impound nga motorsiklo tungod sa serious traffic violations.
Gipahigayon ang ‘Oplan Bulabog’ sa napulo ka presinto sa kapulisan ning dakbayan diha sa Sta Ana PNP (Brgy 23-C, Piapi); Sanpedro PNP ( Purok 6,7,8, Brgy 12-B, Mapa St.); Talomo PNP (Prk 23-B, Aroma Beach, Brgy 76-A); Sasa PNP (Km12, Sasa); Buhangin PNP (Prk15, Sto Nino, Brgy Tigatto); Bunawan PNP (Blk 1-9, Muslim Vil., Ilang); Toril PNP (Prk 11&14, Brgy Sirawan); Tugbok PNP ( Sitio Sinalikway, Bago Oshero, Mintal); ug Calinan Pnp sa Brgy Biao Joaquin diin nahuman kini alas 8:30 sa buntag.
Gihimo ang maong operasyon sa pagpanguna sa DCPO uban ang lain pang security forces.
Sumala ni DCPO Spokesperson Maria Teresita Gaspan, kini ang unang gipahigahiyon nga ‘Oplan Bulabog ug ‘Oplan Lambat Bitag Sasakyan’ sa tuig 2018.
RadyomaN Don Pulayao
