General Santos City–Dul-an usa ka gatos ka mga sakyanan nga gilangkuban sa mga tricycle, jeepney ug mga motorsiklo ang gipangdakop sa otoridad atubangan sa mga dagkong mall sa J. Catolico Avenue ning syudad sa Gensan kagahapong adlawa.
Ang maong operasyon ang gipahigayon sa kapulisan sakop sa City Mobile Force Company ug Mobile Patrol Unit ilawom sa Gensan City Police Office.
Sumala ni Police Sr. Inspector Davis Dulawan, ang mga gipangdakop nga mga sakyanan nakasupak sa Republic Act 4136 (Transportation Law Of The Philippines).
Dugang pamahayag ni PSI Dulawan nga sagad bayolasyon sa mga dinakpang motorista mao ang iligal terminal, obstraction ingon man mga kakulangan sa mga papeles sa sakyanan ug walay lisensya.
Gawas matud pa nga gipangkumpiska ang mga drivers license sa mga nakasupak, ang uban kanila gipang-impound gyud ang mga sakyanan butang nga gipalagan sa mga draybers.
Aminado si Dulawan nga dugay nang problema ang congestion kon kahuot sa trapiko sa maong dalan ilabi na sa hapon tungod dunay mga iligal nga nagaterminal nga maoy nakasagabal sa mga muaging mga motorista.
Gibutyag usab ni PSI dulawan nga ayha pa man gipatuman ang maong operasyon nagpahigayon una sila ug security managers meeting uban ang mga stakeholders.
Kini aron nga maplano ug han-ay nga mapatuman ang implementasyon sa transportation law sa maong lugar.
Matud ni Dulawan nga kung padayong magmagahi ang mga traffic violator sa maong lugar posible nga magpahigayon pa gihapon sila ug susamang operasyon sunod nga mga adlaw. (Jordan Britos)
