Jaro, Iloilo City – Ginreklamo sang mga boarders sang pamilya Soliva sa Banker’s Village, Brgy. Quintin Salas, Jaro ang operasyon sang Regional Drug Enforcement Unit (RDEU-6) kagab-i, Septyembre 12.
Gin-alegar sang mga ini nga nagkaladula ang ila mga gamit pati na ang kwarta matapos ginpang-ukay sang mga katapo sang RDEU-6 ang ila gina-arkilahan nga mga kwarto.
Suno kay alyas Boy, isa sa mga boarders, gintipon sila sa isa ka lugar sang ginpatigayon ang operasyon .
Apang sang natapos na, ila natalupangdan nga na-ukay na ang ila kwarto kag nagkaladula na ang ila mga gamit pati ang kwarta.
Ginpahayag ni Boy nga nadula pati ang iya perfume, kulintas kag kwarta sa wallet nga naglab-ot sa 2,320.00
Natingala man ang iban nga boarders nga wala na nabalik ang iban nga cellphone nga temporaryo nga ginconfiscate sang mga otoridad kag indi na ma-contact sang ila gintawgan. Ginakwestyon karon sang mga boarders kon ngaa ginpang-ukay ang ila kwarto nga wala sang search warrant ang mga operatiba kag buy bust operation ang natabo.
Gin-athag ni Boy nga wala sila sang kaangtanan sa pamilya Soliva kag nagarenta lang sila sang kwarto.
Suno sa iya nga indi na sila magpagamo apang ila ginahingyo nga ibalik lang ang ila pinangabudlayan bangud suno sa iya, nagapangabuhi man sila sang maayo.
Madumduman nga kagab-i, gin-subject sa buy bust operation ang anak ni anay Remedios Rumualdez, Agusan del Norte Mayor Nilo Soliva nga si Clint Soliva apang wala ini madakpan sang mga otoridad.
Arestado naman ang ginapahayag live in partner ni Soliva nga si Rosalie Gellanga , Ryan Constantino nga nagaserbe runner ni Soliva kag si Joely Develes .
Narecover sang mga otoridad ang 8 ka sachet sang shabu nga naglab-ot sa 50 mil pesos ang street value, 5,200.00 nga buybust money , mga pusil kag bala.
