Davao City – Gisukmatan karo sa Nagkaisa Labor Coalition ang nasudnong gobyerno kung asa napaingon ang P1B nga donasyon gikan sa pribadong kumpanya dungan sa efforts nga paghatag og pagtagad sa mga doktor ug mga nurses nga maoy frontliners sa pakig-batok sa COVID-19.
Nakasaway si Mike Ybanez, NLC Focal Person sa kagamhanan kay daw gipasagdan ug wala suportahi ang mga frontliners luyo sa daghang tabang nga gitunol gikan sa mga pribadong contributor apan wala muabot ngadto sa mga doctors ug mga nurses.
Nabantayan ni Ybanez nga dili kumpleto og personal protective equipment (PPEs) ang mga frontliners rason nganong sagad sa mga unang naigo sa balatian mga doktor ug kung magpadayon ang maong sitwasyon, nan lisod mapildi sa mga frontliners ang kaaway.
Segun ni Ybanez, ang tanang mutabang sa giyera kontra COVID-19 gikinahanglang suportahan uban ang panawagan nga unahon sa mass testing ug hatagan og ekipo ang tanang health workers maingon man ang ilang pamilya.
Dugang ni Ybanez nga meritorious ang proposal nga padak-an ang sweldo sa mga doktor ug mga nurses sa nasud aron ma-engganyo sila nga mupabilin dinhi sa Pilipinas ug mo-serbisyo’g mangalagad sa katawhang Pilipino inay sa mga langyaw’ng kanasuran sama karon nga mihampak ang COVID-19 diin kulang sa gihapon kaayo ang medical workers.
RadyoMaN Joel Viray
