Davao City – Daw walay bilib ang usa ka abogado sa tulo ka leading aspirants sa speakership aron pangulohan ang 297 ka mga kongresista sa tibuok Pilipinas.
Alang kang Atty. Deo Contreras, pareho walay mapili sa gipangtuboy sa administrasyon gumikan sa kakulang sa igong kapasidad ug kakulang sa kasinatian alang sa maong katungdanan.
Matud ni Contreras, mas angayan unta nga mamahimong lider sa Kongreso ang veteran legislator nga si Congressman Ronaldo Zamora.
Si Rep. Alan Peter Cayetano ug ang katunga niini sa termino nga si Rep. Lord Allan Velasco wala ra makatupong kang Zamora diha sa hisgutanang kasinatian ug kapasidad aron tugyanan sa seryosong lingkuranan sa speakership.
Ang nasawayan pa ni Contreras ngadto nila Cayetano ug Velasco mao ang pagnaug nila sa level ni Mayor Inday Sara Duterte-Carpio nga kun buot isipon, national level naman unta sila.
Busa, gingil-aran ang abogado nila ni Cayetano ug Velasco nga tungod sa ambisyon nga mahimong speaker, gipakawalay bili na lamang nila ang ilang position aron makuha lang ang pabor ug impluwensiya sa presidential daughter ug presidential son.
Kun ang laraw sa administrasyon sa pagtuboy kang Cayetano ug Velasco sa speakership pinaagi sa term-sharing mao ang pagpangandam sa 2022 election kung asa ang posibling padaganon mao si Mayor Inday Sara, nan karon pa lang daan gihingusgan na sa abogado nga wala na’y dapat lain pang Duterte ang tugtang mahimong pangulong sa nasud.
Si Contreras usa ka mining consultant ug tigsulat og mga libro mahitungod sa kahimtang sa pagmina sa nasud.
Usa usab siya ka kanhi supporter ni Pres. Duterte sa 2016 midterm elections.
RadyoMaN Joel Viray
