OPISYAL NA PAHAYAG MANUNGOD SA SARONG TAGA-TINAMBAC NA NAG-POSITIBO SA COVID-19, ASIN SA KATAKOD NA PARTIAL LOCKDOWN KAN DUWANG BARANGAY

17

July 8, 2020
Marhay na banggi man giraray namomotan kong mga kahimanwa!
Mamundo kong ipinapaisi saindo gabos na SARO (1) sa syertong nagkaigwang close contact o nakaharanihan ni Bicol #110 sa Barangay Bataan an NAG-POSITIBO ngonyan sa swab test na pigsagibo kan Provincial Health Office kan nakaaging semana asin pinag-eksaminar kan Department of Health.
Siya ngonyan si Bicol #195. Siya po ASYMPTOMATIC.
Siya residente kan Sitio Hubo (Crossing) kan Barangay Bolaobalite asin nagtetenir man sa Barangay Sogod.
Nin huli kani, magabat sa boot tang ipapautob poon ngonyan na oras an LOCKDOWN sa Sitio Hubo (Crossing) kan Barangay Bolaobalite asin an PARTIAL LOCKDOWN sa Zone 4 kan Barangay Sogod, o sa gabos na kaharongan na poko mas o menos 30 metros an distansya hale sa Kapilya ni Nuestra Señora de Peñafrancia sa Barangay Sogod.
Sa liwat, an lockdown po PARTIAL sana asin bako sa enterong Bolaobalite asin Sogod.
Si Bicol #195 yaon ngonyan sa kustodiya kan Provincial Health Office sa Banasi, Bula tanganing magpaumay asin mapangatamanan an salud, asin dae na makaulakit.
Padagos ngonyan an swab test sa pamilya asin iba pang nakahampang ni Bicol #110 sa satuyang banwaan. An gabos na nag-aagi sa swab test yaon sa higot na quarantine.
Padagos po kitang maglikay, magmaan, asin mag-utob sa mga polisiya asin protokol kan gobyerno mantang linalabanan ta ining pandemya.
Urog sa gabos, an padagos tang pag-arang sa Kagurangnan na matapos na ining pandemya asin maisalbar kita gabos sa ano pa man na huma.
–(Sgd) Atty. RUEL BRIOSO TUY Municipal Mayor
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments