Sarangani province–Dako ang pagdayig ni Assistant Secretary Paul Anthony Pangilinan, ang commissioner-at-large sa NYC kon National Youth Commission tungod sa gipakita nga lig-on nga liderato ni Governor Steve Chiongbian Solon hilabi na sa pag-amping sa kinaiyahan og ang pag-ila sa boses sa mga kabatan-unan.
Sa giluwatan nga pamahayag sa maong opisyal una pormal nahuman ang tulo (3) ka adlaw nga Mindanao-wide Youth Conference for Climate Change nahitabo sa lungsod sa Kiamba og una pa kini nibalik sa kauluhang Maynila, gibutyag niini ang iyang gikalipay og sa iyang mga kaubanan tungod sa gipakita nga bug-os nga pagsuporta sa gobernador sa ilang kalihukan nga makahatag inspirasyon og matabangan mapasabot ang mga kabataan sa ilang dakong papel aron respondehan ang usa sa dakong problema karon dili ra sa Pilipinas kundili sa entiro kalibutan nga mao ang climate change kon pag-usab usab sa panahon nga siguradong gadala og dakong hulga sa kalamidad og katalagman sa mga katawhan.
Natestingan na matud pa nilang muduol sa ubang mga opisyales sa ubang lugar og probinsya sa Pilipinas apan sa Sarangani Province lang nila nabatyagan ang hugot nga pag-ayuda sa lokal nga panggamhanan tungod kay apil gayud matud pa sa prayoridad ang climate change og ang pag-protekta sa kinaiyahan.
Gatusan ka mga environmental youth leaders tibuok Mindanao ang nitambong sa maong Conference of Youth, Youth in Climate Change Action natigayon mismo sulod sa naila na nga Princess del Leonor Hotel Resort and Convention Center sa may Barangay Kayupo, Kiamba, Sarangani Province.
