Opisyal sa sundalo, anak sa kanhi bise mayor, nurse ug uban pa, nga nadakpan sa PDEA-10 nakatakda nang pasakahan ug kaso

213

Malaybalay City, Bukidnon – Gi-andam na ang kasong ipasaka batok sa mga personalidad nga nadakpan sa Philippine Drug Enforcement Agency Region 10 (PDEA-10) kaniadtong Biyernes sa kadlawon.

Una niini, nadakpan sa gilusad nga anti-drug buy bust operation ang negosyanteng anak sa kanhi city vice mayor sa Malaybalay, usa ka nurse, kauban ang usa ka opisyal sa sundalo ug laing upat pa sa usa ka inn sa Barangay Sumpong, Malaybalay City, Bukidnon.

Gipahayag sa PDEA-10 nga target sa ilang tropa nga masikop ang suspek nga si Geoff Augustus Silabay nga usa ka provincial nurse ug gikonsiderang pusher, (HIO/High Value Target/ Drug Den Maintainer).


Apil sa mga nadakpan sila si Lorenzo Victor Aldeguer nga anak ni kanhi City Vice Mayor Victor Aldeguer kauban ang sundalo nga si 2nd Lt Arthur Rey Aranggo sa 7th ID, 4th Magsaysay, Philippine Army, Nueva Ecija nga anaa sa sulod sa kuwarto.

Nasikop usab ang usa matud pa ka seaman nga si Shinray Dumaguit, mga magtutungha nga sila si Maria Lourdes Velencia ug Juliet Kane Cruspero ug mag-uuma nga si Roger Hernandez.

Nakumpiska sa mga suspek ang lima ka sachets sa suspected shabu nga adunay market value nga P135,000, drug paraphernalias, celphones ug usa ka Isuzu MUX.



Samtang naghimo usab ug follow up operation ang mga operatiba sa P-5, Brgy. 9 ug nadakpan ang matud pa usa ka Marawi evacuee nga si Elinor Elias nga gi-akusahan nga maoy nagdala sa shabu supply alang kang Silabay.

Nagtoo ang PDEA nga si Elias maoy nagpalusot ug droga gikan sa Marawi City.


Susamang gihimakak usab sa mga suspek ang akusasyon nga gibato sa ilaha.

Sa karon, nakabilanggo sa PDEA-10, nga nakabase sa Cagayan de Oro City ang mga suspek ug gi-andam na ang kaso alang sa kasupakan sa Sections 5, 6, 7, 11 ug 12 sa Article 11 sa RA 9165 nga ipasaka batok niini ugmang adlawa.

Facebook Comments