RMN Laoag — Nangipilan iti mayannatup a reklamo ti maysa a kandidato ti kinakonsehal iti Bacarra, Ilocos Norte a ni Mr. Antonio Molina, dati a padi kontra kenni Mayor Nicomedes De La Cruz, kalpasan a maipagarup a kinabil ti mayor itay kallabes.
Idinto nga nangipila met ti ‘counter charge’ ni Dela Cruz kontra iti grupo ni Molina nga idadauloan ni Barangay Chairman Derek Velasco iti Barangay Buyon, Bacarra. Ni Velasco ket agkandidato a mayor iti nasao nga ili.
Malagip a ti nasao a pasamak ket naaramid kabayatan ti maysa a medical mission a naiyuswat idiay Barangay Buyon a nangkritikaran ni Mayor De La Cruz gapu ta saan kano a naipakada iti munisipyo.
Ginandat ti mayor a pagsardengan ti nasao a medical mission, ket kabayatan ti panagsasaona, invideo daytoy ni Molina babaen ti cellphonena nga isu metten ti rason a maipagarup a nangkabilan na.
Kabayatanna, ti anak ni De La Cruz a ni Fritzie Ann Kaye ket isu ti makalaban ni Derek Velasco iti kinamayor iti ili ti Bacarra inton umay a panagpipili.
Bernard Ver, RMN News
