Davao City – Sabay sa hingpit nga pag-abli sa klase karong Hunyo 3, 2019, gikatakdang ilusad sa kapulisan ang Oplan Balik Eskwela 2019.
Atol sa gipahigayong AFP-PNP Presscon, giingon ni Police Regional Office (PRO-XI) Regional Director Brig. Gen. Marcelo Morales nga mag deploy sila og mga personahe sa tanang pribado ug pampublikong tulunghaan sa tibuok Davao region aron mubantay ug magpahigayon og inspeksyon sa mga mosulod ug gawas sa maong lugar.
Gawas niini, maghatag og mga leaflets ang kapulisan ngadto sa mga ginikanan ug estudyante kung sa unsaon paglikay nga mamahimong biktima sa bullying ug ubang klaseng krimen sama sa riot, kawat ug uban pa.
Dugang niini, magmontar ang Davao City Police Office (DCPO) og Police Assistance Desks sa mga tulunghaan dinhi sa syudad diin magsugod og serbisyo alas-6:00 sa kabuntagon.
Nasayran nga karong school year 2019-2020, gibana-banaang kapin 1.2 million ka mga estudyante sugod kinder hangtod senior high school ang gilaumang magtungha.
RadyoMaN Jason Amisola
