Davao City – Magpahigayon og simultaneous launching ang kapulisan sa ‘Clean Rider’s Sticker’ campaign karong Hulyo 27, 2018.
Sumala ni Police Regional Office-Davao Region (PRO Xl) spokesperson Police Chief Insp. Milgrace Driz, subay kini sa Implementation Plan 26-2018 diin butangan og stickers ang matag motorsiklo kinsa tumong nga masolusyonan ug makunhuran ang kiriminalidad nga gikalambigitan sa mga motorcycle riding suspects.
Gitataw ni Driz nga adunay 13 ka mga kaso ang anaa sa SITG diin tulo pa lamang niini ang naresolba.
Gipasabot ni Driz nga dili basta-basta makadawat sa mga stickers ang mga aplikante gumikan gikinahanglan usa isumite niini ang mga kaugalingon alang sa pagkuha sa mga personal nga datos dayon i-register sa Philippine National Police – Information Technology Management System (PNP-ITMS) data base diin daling ma-download kini sa mga nagkadaiyang Police Stations.
“Ihatag ninyo inyong mga data OR, CR, drivers license ug two valid government IDs, pwede na cedula,” segun niini.
Sumala ni Driz nga adunay kapin 260,000 ka mga stickers ang gitagana alang sa Rehiyon 11 diin makadawat og tig-duha ang mga aplikante nga idikit sa drivers license ug sa motorsiklo mismo aron mamonitor kung pareho ang serial numbers sa duha sa stickers.
Kahinumdoman nga gisugdan na kini sa Camp Crame ngadto sa kaulohan ug gilusad sa matag regional office samtang pangulohan kini mismo ni Davao City Director P/Sr. Supt. Alexander Tagum dinhi sa dakbayan sa Davao.
RadyoMaN Jason Amisola
