Davao City – Daghang mga kontrabandos o mga gidiling butang nga gitipigan sa mga piniriso sa Sasa Police Station, ang nakumpiska sa gilusad nga ‘Oplan Galugad’ kun surpresa nga inspeksiyon.
Wala makaandam ang mga preso aron itago ang ilang mga gamit nga gidili sulod sa selda gumikan sa kalit nga inspeksiyon nga gihimo ala 1:00 sa kadlawon sa pagpanguna mismo sa hepe nga si Police Major Reuben Libera.
Nakumpiska gikan sa mga piniriso ang mga kontrabandos nga puwede magamit sa pagpangdagmal ug uban pang katuyoan sama sa tulo ka bakos nga dunay puthaw, mga sigarilyo, tulo ka blade, multi insect killer, charger sa cellphone, touch screen, cellphone ug uban pa.
Nagtoo ang kapulisan nga sekretong gipalusot sa presohan sa mga kabanay sa piniriso hinungdan nga wala kini mabantayi.
Ang Oplan Galugad kabahin sa regular program sa Presinto 4 aron masiguro nga walay mga gidiling butang makasulod sa selda tungod sa posibilidad nga basin gamiton sa dili maayo nga katuyoan sa mga bilanggo.
RadyoMaN Joel Viray
