Roxas City, Capiz- Nangin madinalag-on ang ginpatigayon kaina sang aga nga Operation Greyhound ukon Oplan Galugad sa mga selda sa Roxas City Jail nga nahamtang sa Brgy. San Jose, Roxas City. Kasunod sini ginpatigayon man ang surprise drug test sa mga inmates.
Ang amu nga operasyon nga kabahin sang “Oplan Linis Piitan” nga programa kun sa diin nangin katuwang sang BJMP-Roxas amu ang Roxas City PNP kag Roxas City Bureau of Fire Protection kag ginsaksihan sang mga katapo sang media kag mga opisyales sang Brgy. San Jose.
Ginsiling ni Jail Warden Chief Inspector Abner Zamora, katuyoan sini nga mangin isa ka drug free facility ang BJMP-Roxas pinaagi sa isa ka surprisa nga drug testing sa mga inmates kag mga personnel sang amo nga pasilidad.
Kalakip sa mga nakumpiskar ang mga personal nga gamit sang mga inmates kapareho sang toothbrush, plantsa, hanger, lighter, mga nail cutter, set sang baraha, pointed objects kaangay sang kutsara, ballpen, lapis, sardinas kag iban pa samtang wala naman sang may nakuha nga mga kontrabando kaangay sang ilegal nga druga ukon armasluthang.
Samtang sa pihak nga bahin sa ila ginpatigayon nga inspection, ginsiling sang City Fire Marshal nga si Fire Senior Inspector Stephen Jardeleza sang Roxas City Fire Station nga nakitaan sini sang substandard wiring connection ang sulod sang BJMP Roxas.
