Igapatuman sang Iloilo Provincial Police Office ukon IPPO ang “oplan kaluluwa” sa masunod nga semana kon sa diin igapaidalum sa “full alert” status ang kapulisan sa bug-os nga probinsya.
Ini may kaangtanan sa pagsaulog sang fiesta minatay sa palaabuton nga Noviembre 1-2, 2018.
Pabaskugon sang IPPO ang monitoring kag pagbantay sa mga patyo kag simbahan sa bug-os nga probinsya sang Iloilo.
Magapahamtang sila sang police assistance desks sa tanan nga patyo sa probinsya agud masiguro ang seguridad sang publiko nga magabisita sa ila mga nagtaliwan nga himata.
Nahibaluan nga may yara sang kabug-usan nga 78 ka mga pribado kag pampubliko nga patyo sa bilog nga probinsya.
Ginpahayag ni IPPO director Sr. Supt. Marlon Tayaba, ginmanduan na niya ang mga kapulisan nga pabaskugon ang paghiwat sang mobile kag foot patrol sa mga patyo.
Ginpahanumdum man ni Tayaba sa publiko nga indi magdala sang mga makahulubog nga ilimnon, mga makamamatay nga hinganiban, kag likawan man ang pagsuksok sang malahalon nga alahas kon magkadto sa mga patyo.
Photo from web
